டிச.18இல் மாற்றுத் திறனாளிகளுக்கான சிறப்பு மனுநீதி நாள் முகாம்

இதுகுறித்து மாவட்ட ஆட்சியர் பிரசாந்த் மு. வடநேரே வெளியிட்ட செய்திக்குறிப்பு: கன்னியாகுமரி மாவட்டத்தில் மாற்றுத் திறனாளிகளின் குறைகளை கேட்டறிந்து களைந்திடும் வகையில், சார்- ஆட்சியர் மற்றும் கோட்டாட்சியர் தலைமையில் மாதந்தோறும் 3ஆவது செவ்வாய்க்கிழமை சிறப்பு குறைதீர் கூட்டம் நடைபெற்று வருகிறது.
டிசம்பர் மாதத்துக்கான குறைதீர் கூட்டம், வருகிற 18ஆம் தேதி முற்பகல் 11 மணிக்கு மாவட்ட ஆட்சியர் அலுவலக வளாகத்தில் உள்ள கோட்டாட்சியர் அலுவலகத்திலும், மாலை 3 மணிக்கு பத்மநாபபுரம் சார்-ஆட்சியர் அலுவலகத்திலும் நடைபெறவுள்ளது. இதில் அனைத்துத் துறை அலுவலர்களும் கலந்துகொள்கின்றனர். முகாமில் பெறப்படும் மனுக்களுக்கு, உடனுக்குடன் தீர்வு காண நடவடிக்கை மேற்கொள்ளப்படவுள்ளது.
எனவே, மாற்றுத் திறனாளிகள் கோட்ட அளவிலான சிறப்பு குறை தீர் கூட்டத்தில் கலந்துகொண்டு பயன்பெறலாம் என செய்திக்குறிப்பில் தெரிவிக்கப்பட்டுள்ளது.